Yahdah Raug Ntes Xya Caum Xyoo

1 Tej lus uas hais tuaj rau Yeremyah‎ ntsig txog cov tibneeg Yahdah sawvdaws yog xyoo plaub uas Yauxiyas tus tub Yehauyakhi‎s ua vajntxwv kav Yahdah. Xyoo ntawd yog thawj xyoo uas Nenpu-khanexas ua vajntxwv hauv Npanpiloos.

2 Mas Yeremyah‎ uas ua xibhwb cev (יחוח)Yahweh lus hais tej lus ntawd rau cov tibneeg Yahdah sawvdaws thiab cov uas nyob hauv Yeluxalees sawvdaws tias, 3(יחוח)Yahweh hais nws tej lus rau kuv tau nees nkaum peb xyoos lawm, txij thaum xyoo kaum peb uas Asmoo‎s tus tub Yauxiyas ua vajntxwv kav Yahdah los txog hnub no, mas kuv kuj hais rau nej tsis tu ncua li, tiamsis nej tsis mloog.

4 Txawm yog (יחוח)Yahweh txib nws cov tub qhe uas yog xibhwb cev (יחוח)Yahweh lus sawvdaws los rau nej tsis tu ncua li, los nej tsis mloog, tsis tig nej lub qhov ntsej mloog.

5 Lawv hais tias, nej txhua tus cia li tig ntawm nej txojkev phem thiab nej tej kev txhaum rov qab, thiaj nyob tau hauv lub tebchaws uas (יחוח)Yahweh muab pub rau nej thiab nej tej poj koob yawm txwv txij thaum ub los mus ib txhis li. 6 Tsis txhob mus raws ncuj nciav luag tej dab thiab txhob ua koom txhob pe hawm tej dab ntawd, thiab tsis txhob zes ua rau kuv chim vim tej uas nej txhais tes ua. Mas kuv thiaj tsis tso kev txom nyem rau nej. 7 (יחוח)Yahweh hais tias, txawm li ntawd los nej tsis mloog kuv, nej tseem txhob txwm zes ua rau kuv chim vim tej uas nej txhais tes ua, nej thiaj lob kev txom nyem rau nej. 8 Vim li no (יחוח)Yahweh uas muaj hwjchim loj kawg nkaus hais li no tias, vim yog nej tsis mloog kuv tej lus, 9 (יחוח)Yahweh hais tias, saib maj, kuv yuav hu txhua haiv neeg uas nyob sab ped thiab hu kuv tus tub qhe Nenpukhanexas uas ua vajntxwv hauv Npanpiloos, mas kuv yuav coj lawv tuaj tawm tsam lub tebchaws no thiab cov tibneeg uas nyob hauv, thiab tawm tsam txhua lub tebchaws uas nyob ib ncig. Kuv yuav ua rau lawv puam tsuaj tag huvsi, thiab ua rau lawv ua lub chaw uas luag ceeb thiab ntshai, thiab raug luag thuam thiab raug nyob do cuas mus ib txhis.

10 Tsis yog li ntawd xwb, kuv tseem yuav ua kom lub suab luag lub suab zoo siab, thiab nraug vauv nkauj nyab lub suab thiab lub suab zom zeb thiab tus duab teeb ploj ntais hauv nej mus. 11 Tag nrho lub tebchaws no yuav pob tag thiab liamsim tag, thiab tej tebchaws no yuav ua num rau tus vajntxwv hauv Npanpi-loos xya caum xyoo.

12 (יחוח)Yahweh hais tias, thaum puv xya caum xyoo lawm kuv yuav rau txim rau tus vajntxwv hauv Npanpiloos thiab lub tebchaws ntawd uas yog cov Kheedias lub tebchaws, vim lawv ua txhaum muaj txim, thiab ua rau lub tebchaws nyob liamsim tag mus ib txhis. 13 Kuv yuav tso txhua yam uas kuv twb hais tseg tawm tsam lub tebchaws ntawd lawm, los raug lub tebchaws ntawd, yog txhua yam uas sau cia rau hauv phau ntawv no uas Yeremyah‎ tau cev tawm tsam ib tsoom tebchaws sawvdaws.

14 Txawm yog cov Npanpiloos los yuav muaj ntau lub tebchaws thiab tej vajntxwv loj yuav muab lawv ua qhev. Kuv yuav ua pauj rau lawv raws li lawv tej haujlwm thiab raws li tej uas lawv txhais tes ua.

​

(יחוח)Yahweh Rau Txim Rau Txhua Lub Tebchaws

15 (יחוח)Yahweh uas yog Ixayees Tus Tswv hais li no rau kuv tias, cia li txais lub khob cawv txiv hmab no uas yog kuv txojkev npau taws ntawm kuv txhais tes mus, thiab yuam txhua lub tebchaws uas kuv txib koj mus ntawd haus lub khob no. 16 Lawv yuav haus thiab qaug yoj yuj yees tsis meej pem vim yog rab ntaj uas kuv xa mus rau hauv lawv nruab nrab. 17 Mas kuv thiaj txais lub khob ntawm (יחוח)Yahweh txhais tes thiab yuam txhua lub tebchaws uas (יחוח)Yahweh txib kuv mus ntawd haus. 18 Yeluxalees thiab Yahdah tej moos thiab tej vajntxwv thiab cov thawj hauv Yahdah kuj haus ua rau lawv piam tag nyob do cuas, thiab raug luag thuam thiab ua lo lus tsawm foom yam li niaj hnub nimno. 19 Iziv tus vajntxwv Falaus thiab nws cov tub teg tub taws thiab nws cov thawj thiab nws cov pej-xeem sawvdaws, 20 thiab lwm haiv neeg uas nrog lawv nyob sawvdaws kuj haus. Tej vajntxwv hauv tebchaws Us txhua tus thiab tej vajntxwv hauv tebchaws Filixatees txhua tus kuj haus, yog lub moos Akheloos, lub moos Kaxas, lub moos Ekhoos thiab cov tibneeg hauv lub moos Asadaus uas tseem tshuav nyob. 21 Edoos, Mau‑as thiab cov tibneeg Asmoo‎s kuj haus. 22 Cov vajntxwv hauv lub nroog Thailab txhua tus thiab cov vajntxwv hauv lub moos Xaidoos txhua tus thiab cov vajntxwv raws ntug dej hiavtxwv sab tid txhua tus kuj haus. 23 Lub moos Dedas, lub moos Themas, lub moos Npub thiab cov tibneeg sawvdaws uas chais plaubhau txij nplooj ntseg  kuj haus. 24 Cov vajntxwv hauv Alanpias txhua tus thiab cov vajntxwv txhua tus uas kav ntau haiv neeg uas nyob hauv ntuj nrag teb do kuj haus. 25 Cov vajntxwv hauv lub moos Xilis thiab hauv lub moos Elas thiab hauv tebchaws Midias txhua tus puavleej haus. 26 Thiab cov vajntxwv uas nyob sab ped, tsis hais nyob deb nyob ze ib tug dhau ib tug huvsi, thiab txhua lub tebchaws hauv ntiajteb no uas nyob hauv qab ntuj kuj haus. Thiab tus vajntxwv hauv Npanpiloos yuav haus tom qab tej vajntxwv no. 27 Mas koj hais li no rau lawv tias, (יחוח)Yahweh tus muaj hwjchim loj kawg nkaus uas yog Ixayees Tus Tswv hais li no tias, cia li haus, haus kom qaug thiab ntuav, cia li ntog tsis txhob sawv los li, vim yog hniav ntaj uas kuv xa tuaj rau hauv nej nruab nrab. 28 Yog lawv tsis kam txais lub khob ntawm koj txhais tes mus haus, koj cia li hais rau lawv tias, (יחוח)Yahweh uas muaj hwj-chim loj kawg nkaus hais li no tias, nej yuav tsum haus. 29 Saib maj, kuv twb pib tso xwm txheej phem rau lub nroog uas hu raws li kuv lub npe lawm, mas nej yuav tsis raug rau txim lov? Nej yuav tsis dim kev teem txim rau qhov kuv tabtom hu ib rab ntaj los tawm tsam cov tibneeg uas nyob hauv ntiajteb sawvdaws. (יחוח)Yahweh uas muaj hwjchim loj kawg nkaus hais li no ntag. 30 Vim li no koj yuav tsum cev tej lus no huvsi tawm tsam lawv, thiab hais rau lawv tias, (יחוח)Yahweh yuav nyooj laws ntawm lub chaw siab thiab yuav tsa suab qw ntawm nws lub chaw nyob uas dawb huv. (יחוח)Yahweh yuav nyooj laws tawm tsam nws pab yaj thiab yuav qw nrov yam nkaus li cov uas tsuam kua txiv hmab qw, tawm tsam ib tsoom tibneeg sawvdaws hauv lub ntiajteb. 31 Lub suab yuav nrov ntxhe mus thoob qab ntuj kawg, rau qhov (יחוח)Yahweh nrog ib tsoom tebchaws muaj plaub, nws yuav txiav txim rau ib tsoom tibneeg, mas nws yuav xuas ntaj tua cov tibneeg limhiam.

(יחוח)Yahweh hais li no ntag.

32 (יחוח)Yahweh uas muaj hwjchim loj kawg nkaus hais li no tias, saib maj, vij sub vij sw tabtom raug ib haiv neeg dhau ib haiv neeg, thiab cua daj cua dub ntsawj tim qab ntuj kawg tuaj. 33 Cov uas (יחוח)Yahweh tua rau hnub ntawd yuav muaj thoob plaws sab ntuj no mus txog sab ntuj tim ub. Lawv cov ntawd tsis muaj leejtwg yuav quaj ntsuag lossis muab sau coj mus faus. Lawv yuav zoo li quav tsiaj txhu saum npoo av. 34 Nej cov uas yug yaj, cia li quaj nyiav thiab quaj lauj! Nej cov tswv yaj, cia li da luj luam hauv cub tshauv, rau qhov txog hnub uas muab nej tua thiab nej yuav tawg ri sua, thiab nej yuav ntog vau hlo tawg tag yam li lub tais ntim uas zoo nkauj. 35 Cov uas yug yaj tsis tau kev khiav thiab cov tswv yaj tsis muaj kev dim.

36 Cia li mloog cov yug yaj lub suab quaj thiab cov tswv yaj lub suab quaj nyiav, rau qhov (יחוח)Yahweh tabtom ua rau lawv tej tshav zaub puam tsuaj. 37 Tej nkuaj yaj uas nyob thaj yeeb kuj puam tsuaj tag vim yog qhov uas (יחוח)Yahweh chim heev.

38 (יחוח)Yahweh tawm hauv nws lub chaw yam nkaus li tus tsov ntxhuav, thiab lawv lub tebchaws liamsim tag lawm vim tim tus uas tsim txom rab ntaj thiab vim yog (יחוח)Yahweh chim heev.