Xav Muab Yeremyah‎ Tua

1 Thaum Yehauyakhi‎s uas yog Yauxi-yas tus tub pib ua vajntxwv kav Yah-dah tebchaws, (יחוח)Yahweh hais cov lus no tuaj. 2 (יחוח)Yahweh hais li no tias, koj cia li sawv ntsug hauv (יחוח)Yahweh lub tuam tsev lub tshav puam, thiab hais rau Yahdah txhua lub moos uas tuaj pe hawm rau hauv (יחוח)Yahweh lub tuam tsev hais txhua lo lus uas kuv kom koj hais rau lawv tsis txhob tseg ib los li. 3 Tej zaum lawv yuav mloog thiab txhua tus yuav tig ntawm lawv txojkev phem rov los, mas kuv yuav hloov siab tsis ua tej xwm txheej phem uas kuv npaj yuav ua rau lawv vim yog tej kev phem uas lawv ua. 4 Koj yuav tsum hais rau lawv tias, (יחוח)Yahweh hais li no tias, yog nej tsis mloog kuv hais, tsis ua lub neej raws li kuv txoj kevcai uas kuv tau qhia rau nej, 5 thiab tsis quav ntsej kuv cov tub qhe tej lus, yog cov xibhwb cev lus uas kuv txib tuaj cuag nej tsis tu ncua los nej kuj tsis mloog, 6 mas kuv yuav ua rau lub tuam tsev no zoo yam nkaus li lub moos Silau, thiab kuv yuav muab lub nroog no ua ib tsoom tebchaws huvsi thoob qab ntuj lo lus tsawm foom. 7 Cov pov thawj thiab cov xibhwb cev lus thiab cov pejxeem sawvdaws tau hnov Yeremyah‎ hais tej lus no hauv (יחוח)Yahweh lub tuam tsev.

8 Thaum Yeremyah‎ hais tej lus huvsi uas (יחוח)Yahweh kom nws hais rau cov tibneeg sawvdaws xaus nkaus, ces cov pov thawj thiab cov xibhwb cev lus thiab cov pejxeem sawvdaws txawm ntes Yeremyah‎ thiab hais rau nws tias, koj yuav tuag. 9 Ua cas koj yuav tuav (יחוח)Yahweh lub npe cev lus tias, lub tuam tsev no yuav zoo li Silaus, thiab lub nroog no yuav raug nyob do cuas tsis muaj tibneeg nyob hauv?

Mas cov tibneeg sawvdaws sau zog tuaj vij Yeremyah‎ rau hauv (יחוח)Yahweh lub tuam tsev. 10 Thaum Yahdah cov thawj hnov tej xwm txheej no, lawv kuj tawm hauv vajntxwv lub tsev tuaj rau ntawm (יחוח)Yahweh lub tuam tsev, tuaj zaum rau ntawm txojkev uas nkag lub Rooj Loog Tshiab ntawm (יחוח)Yahweh lub tuam tsev. 11 Mas cov pov thawj thiab cov xibhwb cev lus hais rau cov thawj thiab rau cov tibneeg sawvdaws tias, tsim nyog muab yawg no txiav txim tuag, vim nws cev lus tawm tsam lub nroog no raws li nej lub qhov ntsej twb hnov lawd. 12 Yeremyah‎ thiaj hais rau cov thawj sawvdaws thiab hais rau cov tibneeg sawvdaws tias, (יחוח)Yahweh txib kuv tuaj cev tej lus no tawm tsam lub tuam tsev thiab lub nroog no raws li tej lus huvsi uas nej tau hnov. 13 Vim li no, nimno nej cia li kho nej lub neej thiab tej uas nej ua, thiab mloog (יחוח)Yahweh uas yog nej Tus Tswv tej lus, mas (יחוח)Yahweh yuav hloov siab tsis tso tej xwm txheej phem uas nws twb hais lawd los raug nej. 14 Kuv mas kuv nyob hauv nej txhais tes lawm. Nej cia li ua rau kuv raws li nej pom zoo thiab raug cai. 15 Nej cia li paub tseeb tias yog nej muab kuv tua pov tseg, mas nej thiab lub nroog no thiab cov tibneeg uas nyob hauv yuav ris tus tibneeg tsis txhaum tej ntshav. Qhov tseeb yeej yog (יחוח)Yahweh txib kuv tuaj hais tej lus no huvsi kom nkag nej lub qhov ntsej. 16 Cov thawj thiab cov tibneeg sawvdaws txawm hais rau cov pov thawj thiab cov xibhwb cev lus tias, tsis tsim nyog muab tus yawg no txiav txim tuag, vim nws tuav (יחוח)Yahweh uas yog peb Tus Tswv lub npe hais tej lus no rau peb. 17 Muaj cov kev txwj laug hauv lub tebchaws qee leej sawv tsees hais rau cov tibneeg uas tuaj txoos ua ke ntawd tias, 18 Mikhas uas yog tibneeg hauv moos Mauleses tau cev (יחוח)Yahweh lus rau thaum Hexekhiya‎s ua vajntxwv kav Yahdah, nws hais rau cov tibneeg Yahdah sawvdaws tias ,(יחוח)Yahweh uas muaj hwj-chim loj kawg nkaus hais li no tias,  Xi‑oo yuav raug muab laij ib yam li laij teb, Yeluxalees yuav pob tag ua tej niag pawg, thiab lub roob lub tuam tsev yuav ciaj ua roob hav zoov. 19 Yahdah tus vajntxwv Hexekhiya‎s thiab cov Yahdah sawvdaws muab nws tua lawm lov? Hexekhiya‎s ntshai (יחוח)Yahweh thiab thov (יחוח)Yahweh hlub los tsis yog?

Thiab (יחוח)Yahweh tau hloov siab tsis tso tej xwm txheej phem uas nws twb hais rau lawv lawd los raug lawv los tsis yog? Tiamsis peb tabtom yuav coj tej xwm txheej phem loj no los raug peb tus kheej. 20 Tseem muaj dua ib tug xibhwb uas tuav (יחוח)Yahweh lub npe cev lus, npe hu ua Uliyas uas yog Semayas tus tub, uas nyob hauv Khiliyas Ye‑alis. Nws tau cev lus tawm tsam lub nroog no thiab lub tebchaws no ib yam li Yeremyah‎ hais. 21 Mas thaum vajntxwv Yehauyakhi‎s thiab nws cov tub rog sawvdaws thiab nws cov thawj sawv-daws hnov Uliyas tej lus ntawd, vajntxwv nrhiav kev yuav muab nws tua pov tseg. Thaum Uliyas hnov li ntawd, nws kuj ntshai thiab khiav dim mus rau Iziv tebchaws. 22 Ces vajntxwv Yehauyakhi‎s txawm tso Eenathas uas yog Anpaus tus tub thiab dua lwm tus caum mus rau Iziv tebchaws. 23 Lawv ntes tau Uliyas hauv Iziv tebchaws los thiab coj nws los cuag vajntxwv Yehauyakhi‎s, ces vajntxwv txawm xuas ntaj tua nws thiab muab nws lub cev tuag laim pov tseg rau hauv tej qhov ntxa uas faus cov pejxeem. 24 Tiamsis Ahikhas uas yog Safas tus tub tuaj Yeremyah‎ tog, yog li ntawd Yeremyah‎ thiaj tsis raug muab cob rau cov tibneeg tua pov tseg.