Yeremyah‎ Tsab Ntawv Uas Xa Mus Rau Cov Uas Poob Tebchaws

1 Ntawm no mus yog tej lus hauv tsab ntawv uas xibhwb Yeremyah‎ uas cev (יחוח)Yahweh lus xa hauv Yeluxalees mus rau cov kev txwj laug uas poob tebchaws thiab cov pov thawj thiab cov xibhwb cev lus thiab cov pejxeem sawvdaws uas Nenpu-khanexa‎s muab kuav tawm hauv Yeluxalees mus rau hauv Npanpiloos. 2 Tej no yog tom qab uas vantxwv Yekhauniya‎s thiab nws niam thiab cov nraug sam thiab Yahdah thiab Yeluxalees cov thawj, thiab cov Kws txawj txhua yam thiab cov Kws tooj Kws hlau twb tawm hauv Yeluxalees lawm. 3 Tsab ntawv no yog muab rau Elaxas‎ uas yog Safas tus tub thiab Kemaliyas‎ uas yog Hikhiya‎s tus tub coj mus, yog Yahdah tus vajntxwv Xedekhiya‎s txib mus rau Npanpiloos mus cuag Nenpu-khanexa‎s uas ua vajntxwv hauv Npanpiloos. Tsab ntawv no hais tias, 4 (יחוח)Yahweh uas muaj hwjchim loj kawg nkaus, uas yog cov Ixayees Tus Tswv hais li no rau cov uas poob tebchaws, yog cov uas kuv ntiab tawm hauv Yeluxalees mus rau Npanpiloos, hais tias, 5 cia li ua vaj ua tsev thiab nyob rau hauv, cia li ua vaj cog zaub cog txiv thiab noj tej qoob loo ntawd. 6 Cia li yuav pojniam thiab muaj tub muaj ntxhais, cia li muab nyab rau nej tej tub thiab muab nej tej ntxhais qua kom lawv thiaj muaj tub muaj ntxhais huaj vam coob rau qhov ntawd lawv thiaj tsis tsawg zuj zus. 7 Cia li pab kom lub nroog uas kuv ntiab nej mus poob tebchaws ntawd noj qab nyob zoo, thiab thov (יחוח)Yahweh pab lub nroog ntawd rau qhov yog lub nroog ntawd noj qab nyob zoo nej kuj yuav tau kev noj qab nyob zoo thiab.

8 Cov Ixayees Tus Tswv (יחוח)Yahweh uas muaj hwjchim loj kawg nkaus hais li no tias, tsis txhob kheev cov xibhwb cev lus lossis cov uas hais pom tom hauv ntej uas nrog nej nyob dag ntxias nej, thiab tsis txhob mloog tej uas nej kom lawv ua npau suav pom. 9 Lawv tuav kuv lub npe cev lus dag rau nej, kuv tsis tau txib lawv.  (יחוח)Yahweh hais li no ntag.

10 (יחוח)Yahweh hais li no tias, thaum puv xya caum xyoo uas teem rau Npanpiloos lawm, kuv yuav los saib nej, thiab ua kuv tej lus cog tseg kom tiav rau nej thiab coj nej rov los txog lub chaw no.

11 (יחוח)Yahweh hais tias, kuv paub tej uas kuv npaj tseg rau nej, yog tej uas yuav ua rau nej tau zoo tsis yog ua rau nej tau qhov phem, yuav pub kom nej muaj lub neej tom hauv ntej thiab muaj kev vam. 12 Thaum ntawd nej yuav thov hu kuv thiab los taij kuv mas kuv yuav mloog nej. 13 Nej yuav nrhiav kuv thiab ntsib kuv rau thaum nej nrhiav kuv kawg siab kawg ntsws. 14 (יחוח)Yahweh hais tias, nej yuav ntsib tau kuv thiab kuv yuav pub nej rov vam meej li qub thiab qaws nej tawm hauv txhua lub tebchaws thiab txhua qhov uas kuv ntiab nej mus nyob ntawd rov los. Thiab kuv yuav coj nej rov los rau hauv tej chaw uas kuv ntiab nej tawm mus poob tebchaws. (יחוח)Yahweh hais li no ntag.

15 Vim nej tau hais tias, (יחוח)Yahweh tsa xibhwb cev lus hauv Npanpiloos rau peb, 16 mas (יחוח)Yahweh hais li no txog tus vaj-ntxwv uas nyob saum Daviv lub zwm txwv thiab hais txog cov tibneeg sawvdaws uas nyob hauv lub nroog no, yog nej cov kwvtij uas tsis nrog nej tawm mus poob tebchaws.

17 (יחוח)Yahweh uas muaj hwjchim loj kawg nkaus hais li no tias, saib nawj, kuv yuav tso hniav ntaj hniav riam thiab kev tshaib nqhis thiab mob kis mus raug lawv, thiab kuv yuav ua rau lawv zoo yam nkaus li cov txiv cev tsis zoo uas lwj tag noj tsis tau. 18 Kuv yuav xuas ntaj thiab kev tshaib nqhis thiab mob kis raws caum lawv, thiab kuv yuav muab lawv ua lub chaw uas txhua lub tebchaws hauv qab ntuj ceeb thiab ntshai, thiab ua lo lus tsawm foom thiab ua lub chaw txhawj chaw ntshai, ua yam uas luag thuam, thiab tiag luag ncauj luag lo rau hauv txhua lub tebchaws uas kuv ntiab lawv mus ntawd. 19 (יחוח)Yahweh hais tias, lawv tsis mloog kuv tej lus uas kuv txib kuv cov tub qhe uas cev kuv lus tuaj hais rau nej tsis tu ncua, thiab nej kuj tsis yeem mloog. (יחוח)Yahweh hais li no ntag.

20 Nej cov uas poob tebchaws sawvdaws uas kuv ntiab tawm hauv Yeluxalees mus rau Npanpiloos, cia li mloog (יחוח)Yahweh tej lus. 21 Cov Ixayees Tus Tswv (יחוח)Yahweh uas muaj hwjchim loj kawg nkaus hais li no txog Ahaj uas yog Khaulayas tus tub thiab hais txog Xedekhiya‎s uas yog Ma‑axeyas tus tub uas tabtom tuav kuv lub npe cev lus dag rau nej. Saib nawj, kuv yuav muab ob tug ntawd cob rau hauv vajntxwv Nenpukhanexa‎s hauv Npanpiloos txhais tes, mas nws yuav muab ob tug tua pov tseg tab meeg nej.

 22 Vim yog tim ob tug mas cov Yahdah sawvdaws uas poob tebchaws mus nyob hauv Npanpiloos sawvdaws yuav siv lo lus tsawm foom li no hais tias, thov (יחוח)Yahweh ua rau koj ib yam li ua rau Xedekhiya‎s thiab Ahaj uas tus vajntxwv hauv Npanpiloos muab hluavtaws hlawv tuag tag lawd. 23 Rau qhov ob tug ua tej uas ruam kawg li rau hauv cov Ixayees. Ob tug tau deev kwvtij zej zog tej pojniam thiab tau tuav kuv lub npe hais tej lus dag uas tsis yog kuv kom ob tug hais. Kuv yog tus paub thiab kuv ua timkhawv. (יחוח)Yahweh hais li no ntag.

Tej Lus Uas Hais Rau Semayas

24 Koj cia li hais rau Semayas uas yog tib-neeg hauv lub moos Nehelas tias, 25 Cov Ixayees Tus Tswv (יחוח)Yahweh uas muaj hwjchim loj kawg nkaus hais li no tias, koj tau xa tsab ntawv ua koj lub npe mus rau cov tib-neeg sawvdaws uas nyob hauv Yeluxalees thiab rau Xefaniyas uas yog pov thawj Ma‑axeyas tus tub, thiab rau cov pov thawj sawvdaws tias,  26 (יחוח)Yahweh tau tsa koj ua pov thawj nyob tug pov thawj Yehauyadas chaw saib xyuas (יחוח)Yahweh lub tuam tsev thiab muaj hwjchim muab txhua tus tibneeg vwm uas cev (יחוח)Yahweh lus ntxig rau hauv rab cuab thiab muab saw hlau khi caj dab.

27 Nimno ua cas koj tsis txwv Yeremyah‎ uas yog tibneeg Anathau‎s uas cev (יחוח)Yahweh lus rau nej? 28 Rau qhov nws tau xa ntawv tuaj rau peb uas nyob hauv Npanpiloos tias, nej yuav poob tebchaws ntev. Cia li ua vaj ua tsev thiab nyob rau hauv, cia li ua vaj cog zaub cog txiv thiab noj tej qoob loo ntawd. 29 Pov thawj Xefaniyas nyeem tsab ntawv no rau Yeremyah‎ uas yog xibhwb cev (יחוח)Yahweh lus mloog. 30 Mas (יחוח)Yahweh hais lus tuaj rau Yeremyah‎ tias, 31 cia li sau ntawv mus rau cov uas poob tebchaws sawvdaws tias,

(יחוח)Yahweh hais li no txog Semayas uas yog tibneeg Nehelas tias, vim yog Semayas tau cev lus rau nej rau thaum kuv tsis tau txib nws, thiab ua rau nej tso siab rau tej lus dag,32 vim li no (יחוח)Yahweh thiaj hais li no tias, saib nawj, kuv yuav txiav txim rau Semayas uas yog tibneeg Nehelas thiab nws caj ces. Nws yuav tsis tshuav ib tug ciaj sia nyob hauv cov tibneeg no uas yuav pom tej kev zoo uas kuv yuav ua rau kuv haiv neeg, vim yog nws hais lus fav xeeb rau (יחוח)Yahweh. (יחוח)Yahweh hais li no ntag.