Hlawv Yeremyah‎ Thooj Ntawv

1 Xyoo plaub uas Yauxiyas tus tub Yehauyakhi‎s ua vajntxwv kav Yahdah, (יחוח)Yahweh hais lus tuaj rau Yeremyah‎ tias, 2 Koj cia li muab ib thooj ntawv mas sau tej lus huvsi uas kuv tau hais rau koj, yog hais tawm tsam cov Ixayees thiab cov Yahdah thiab ib tsoom tebchaws sawv-daws, txij hnub uas hais rau koj thaum Yauxiyas ua vajntxwv los txog hnub no. 3 Nyaj cov Yahdah yuav hnov txog tej xwm txheej phem huvsi uas kuv xav tseg yuav ua rau lawv, kom lawv txhua tus thiaj tig ntawm lawv txojkev phem thiab kuv thiaj zam lawv tej kev txhaum thiab lawv lub txim.

4 Mas Yeremyah‎ thiaj hu Npalus uas yog Neliyas tus tub los, thiab hais txhua lo lus uas (יחוח)Yahweh tau hais rau nws lawd rau Npalus sau cia rau hauv thooj ntawv. 5 Thiab Yeremyah‎ qhia Npalus hais tias, luag txwv tsis kheev kuv mus rau hauv (יחוח)Yahweh lub tuam tsev. 6 Yog li ntawd, koj yuav tsum mus, mas hnub uas ua kevcai yoo mov koj muab (יחוח)Yahweh tej lus uas koj sau cia rau hauv thooj ntawv raws li kuv hais kom koj sau ntawd nyeem hauv (יחוח)Yahweh lub tuam tsev rau cov pejxeem sawvdaws mloog. Koj yuav tsum muab nyeem rau cov Yahdah uas tawm hauv lawv tej moos tuaj sawvdaws mloog thiab. 7 Mas tej zaum lawv tej lus taij thov yuav mus txog (יחוח)Yahweh, thiab txhua tus yuav tig ntawm lawv txojkev phem, vim yog txojkev chim thiab txojkev npau taws uas (יחוח)Yahweh tau tshaj tawm rau haiv neeg no mas loj heev. 8 Neliyas tus tub Npalus ua txhua yam raws li Yeremyah‎ hais rau nws kom mus nyeem (יחוח)Yahweh tej lus hauv thooj ntawv ntawd rau hauv (יחוח)Yahweh lub tuam tsev.

9 Lub cuaj hli xyoo tsib uas Yauxiyas tus tub Yehauyakhi‎s ua vajntxwv kav Yahdah, cov tibneeg hauv Yeluxalees sawvdaws thiab cov uas tawm hauv Yahdah tej moos sawvdaws tuaj rau hauv Yeluxalees tshaj tawm kom ua kevcai yoo mov rau ntawm (יחוח)Yahweh xubntiag. 10 Ces Npalus thiaj nyeem Yeremyah‎ tej lus hauv thooj ntawv rau cov tibneeg sawvdaws mloog hauv (יחוח)Yahweh lub tuam tsev, ntawm Kemaliyas‎ chav tsev uas nyob hauv lub tshav puam txheej saud ncaj ntawm lub Rooj Loog Tshiab uas mus rau hauv (יחוח)Yahweh lub tuam tsev. Kemaliyas‎ yog Safas uas yog tus sau ntawv li tub. 11 Thaum Mikhayas uas yog Kemaliyas‎ tus tub thiab yog Safas tus xeeb ntxwv tau hno (יחוח)Yahweh tej lus huvsi hauv thooj ntawv ntawd, 12 nws txawm mus rau hauv vajntxwv lub tsev, mus rau hauv chav uas ua ntaub ntawv, mas cov thawj sawvdaws zaum qhov ntawd, yog Elisamas uas ua tus tub sau ntawv, thiab Semayas tus tub Delayas, Anpaus tus tub Eenathas, Safas tus tub Kemaliyas‎, Hananiyas tus tub Xedekhiya‎s thiab cov thawj sawvdaws. 13 Ces Mikhayas txawm piav tej lus huvsi uas nws tau hnov Npalus nyeem hauv thooj ntawv rau cov pejxeem mloog. 14 Cov thawj sawvdaws thiaj txib Nethaniyas tus tub Yehudis, mus hais rau Npalus tias, cia li coj thooj ntawv uas koj nyeem rau cov pejxeem mloog ntawd thiab tuaj cuag peb. Yehudis yawg yog Selemiyas nws yawg koob yog Kushis. Mas Neliyas tus tub Npalus thiaj tuav rawv thooj ntawv ntawd tuaj cuag lawv. 15 Lawv txawm hais rau nws tias, cia li zaum nyeem thooj ntawv ntawd rau peb mloog. Npalus thiaj nyeem rau lawv mloog. 16 Thaum lawv tau hnov tej lus huvsi ntawd, lawv ib leeg saib ntsoov rau ib leeg ntshai kawg, lawv txawm hais rau Npalus tias, peb yuav tsum hais tej lus no huvsi rau vajntxwv paub. 17 Lawv txawm nug Npalus tias, koj qhia peb saib, koj sau tej lus no huvsi li cas? Koj sau raws li Yeremyah‎ hais lov? 18 Npalus teb lawv tias, nws hais tej lus no huvsi rau kuv mloog mas kuv xuas kua mem sau cia rau hauv thooj ntawv. 19 Mas cov thawj hais rau Npalus tias, koj thiab Yeremyah‎ cia li mus khiav nkaum, tsis txhob qhia leejtwg paub tias neb nyob qhovtwg.

20 Thaum lawv muab thooj ntawv ntawd khaws cia rau hauv Elisamas uas ua tus tub sau ntawv chav tsev lawm, lawv txawm mus cuag vajntxwv hauv lub tshav puam. Lawv qhia tej lus huvsi rau vajntxwv paub. 21 Vajntxwv txawm txib Yehudis mus muab thooj ntawv ntawd los. Yehudis thiaj mus muab ntawm Elisamas uas ua tus tub sau ntawv chav tsev los, thiab Yehudis muab nyeem rau vajntxwv thiab cov thawj uas sawv vij vajntxwv sawvdaws mloog. 22 Thaum ntawd yog lub cuaj hli, vajntxwv zaum hauv chav tsev ntuj no thiab muaj ib cub tawg cig plaws ntawm vajntxwv xubntiag. 23 Thaum Yehudis nyeem tag peb plaub pwm, vajntxwv txawm muab rab chais hlais tej uas nyeem tag pov rau hauv cub tawg, hlais li ntawd mus txog thaum thooj ntawv kub hnyiab tag hauv cub tawg huvsi lawm. 24 Vajntxwv thiab nws cov tub teg tub taws uas tau hnov tej lus huvsi ntawd kuj tsis muaj ib tug twg ntshai thiab muab tej tsho dua tseg. 25 Txawm yog Eenathas thiab Delayas thiab Kemaliyas‎ lawv thov vajntxwv tsis txhob muab thooj ntawv ntawd hlawv, los vajntxwv kuj tsis mloog. 26 Vajntxwv tseem hais kom Yelame‑ees uas yog nws tus tub, thiab Xelayas uas yog Axali‑ees tus tub thiab Selemiyas uas yog Ade‑ees tus tub mus ntes Npalus uas yog tus sau ntawv thiab Yeremyah‎ uas ua xibhwb cev lus, tiamsis (יחוח)Yahweh muab ob tug zais lawm. 27 Thaum vajntxwv muab thooj ntawv uas Npalus sau raws li Yeremyah‎ hais hlawv tag lawm, (יחוח)Yahweh hais lus tuaj rau Yeremyah‎ tias,

28 cia li muab dua ib thooj ntawv thiab muab tej lus uas nyob hauv thawj thooj ntawv uas Yahdah tus vajntxwv Yehau-yakhi‎s muab hlawv tag lawd sau huvsi rau hauv. 29 Hais txog Yahdah tus vajntxwv Yeha-uyakhi‎s ntawd koj cia li hais tias, (יחוח)Yahweh hais li no tias, koj muab thooj ntawv no hlawv pov tseg thiab hais tias, ua cas koj sau cia rau hauv tias tus vajntxwv hauv Npanpi-loos yuav tuaj muab lub tebchaws no ua puam tsuaj tiag tiag li, thiab yuav muab tej tibneeg thiab tej tsiaj txhu txiav tawm hauv lub tebchaws no? 30 Vim li no (יחוח)Yahweh thiaj hais txog Yahdah tus vajntxwv Yehauyakhi‎s tias, nws yuav tsis muaj tub ki xeeb ntxwv nyob saum Daviv lub zwm txwv, thiab nws lub cev tuag yuav raug muab laim ziab tshav ntuj kub nruab hnub, thiab hmo ntuj te yuav los ntub.

31 Kuv yuav rau txim rau nws thiab nws caj ces thiab nws tej tub teg tub taws vim yog tim lawv tej kev txhaum. Thiab kuv yuav coj tej xwm txheej phem huvsi uas kuv tau hais tawm tsam lawv los lawv tsis mloog ntawd los raug cov uas nyob hauv Yeluxalees thiab cov tibneeg Yahdah. 32 Yeremyah‎ thiaj muab dua ib thooj ntawv los cob rau Neliyas tus tub Npalus uas ua tus tub sau ntawv, mas Npalus muab txhua lo lus uas muaj hauv thooj ntawv uas Yahdah tus vajntxwv Yehauyakhi‎s muab hlawv kub hnyiab tag lawd sau huvsi raws nraim li Yeremyah‎ hais kom nws sau. Thiab muaj dua ntau lo lus uas sib thooj ntxiv rau.