Yeremyah‎ Raug Muab Kaw

1 Yauxiyas tus tub Xedekhiya‎s uas vajntxwv Nenpukhanexa‎s hauv Npanpiloos muab tsa ua vajntxwv hauv Yahdah tebchaws, sawv Yehauyakhi‎s tus tub Khauniyas chaw ua vajntxwv kav. 2 Txawm yog nws thiab nws cov tub teg tub taws thiab nws cov pejxeem los puavleej tsis mloog (יחוח)Yahweh tej lus uas nws kom Yeremyah‎ uas yog xibhwb cev lus hais rau lawv. 3 Vajntxwv Xedekhiya‎s txib Yehukhas uas yog Selemiyas tus tub thiab pov thawj Xefaniyas uas yog Ma‑axeyas tus tub mus cuag Yeremyah‎ uas yog xibhwb cev lus thiab hais tias, koj cia li thov (יחוח)Yahweh uas yog peb Tus Tswv pab peb.

4 Thaum ntawd Yeremyah‎ tseem mus los hauv cov pejxeem tau, rau qhov tsis tau muab nws kaw hauv tsev lojfaj. 5 Mas Falaus pab tub rog tawm hauv Iziv tuaj. Thaum cov Kheedias uas vij lub nroog Yeluxalees hnov li ntawd, lawv txawm thim tub rog ntawm Yeluxalees rov qab.

6 Thaum ntawd (יחוח)Yahweh hais lus tuaj rau Yeremyah‎ uas yog xibhwb cev (יחוח)Yahweh lus tias, 7 (יחוח)Yahweh uas yog cov Ixayees Tus Tswv hais li no tias, neb cia li mus hais rau Yahdah tus vajntxwv uas txib neb tuaj nug kuv tias, saib nawj, Falaus pab tub rog uas tawm tuaj pab koj tabtom yuav rov qab mus rau lawv lub tebchaws Iziv. 8 Mas cov Kheedias yuav rov qab tuaj ua rog rau lub nroog no, lawv yuav txeeb tau thiab muab hlawv pov tseg. 9 (יחוח)Yahweh hais li no tias, nej tsis txhob rov dag nej tus kheej hais tias, cov Kheedias tso peb tseg lawm lauj, rau qhov lawv yeej yuav tsis tso nej tseg kiag li.

10 Txawm yog nej kov yeej tau cov Kheedias pab tub rog huvsi uas tabtom ua rog rau nej, tsuas yog tshuav cov raug mob txhua tus nyob hauv lawv tej tsev ntaub xwb, los cov ntawd yuav sawv tsees muab hluavtaws hlawv lub nroog no pov tseg. 11 Thaum cov Kheedias cov tub rog thim ntawm Yeluxalees vim yog Falaus pab tub rog tuaj ze, 12 Yeremyah‎ kuj tawm hauv Yeluxalees mus rau Npeeyamee‎s tebchaws thiaj tau nws li feem uas nyob hauv cov tibneeg ntawd.

13 Thaum nws nyob ntawm lub Rooj Loog Npeeyamee‎s, muaj ib tug tub rog faj xwm npe hu ua Iliyas, yog Selemiyas tus tub thiab yog Hananiyas tus xeeb ntxwv, txawm ntes Yeremyah‎ uas cev (יחוח)Yahweh lus, hais tias, koj tabtom khiav mus rau cov Kheedias. 14 Yeremyah‎ hais tias, tsis yog. Kuv tsis yog khiav mus rau cov Kheedias. Tiamsis Iliyas tsis yeem mloog nws hais, nws cia li ntes Yeremyah‎ coj los rau cov thawj. 15 Cov thawj chim heev rau Yeremyah‎, lawv muab nws nplawm thiab muab nws kaw rau hauv Yaunathas uas ua tus tub sau ntawv lub tsev, vim muab lub tsev ntawd ua tsev lojfaj lawm. 16 Thaum Yeremyah‎ raug muab tso rau hauv lub nkuaj av thiab nyob qhov ntawd ntau hnub lawd, 17 vajntxwv Xedekhiya‎s txib tibneeg mus coj Yeremyah‎ los cuag nws, thiab nug Yeremyah‎ twjywm hauv nws lub tsev tias, (יחוח)Yahweh hais lus tuaj los tsis hais? Yeremyah‎ hais tias, muaj thiab. Koj yuav raug muab cob rau hauv tus vaj-ntxwv Npanpiloos txhais tes. 18 Yeremyah‎ hais ntxiv rau vajntxwv Xedekhiya‎s tias, kuv tau ua txhaum li cas rau koj lossis ua rau koj cov tub teg tub taws lossis ua rau cov tibneeg no, koj thiaj muab kuv kaw hauv tsev lojfaj?

19 Koj cov xibhwb cev lus uas hais rau koj tias, Npanpiloos tus vajntxwv yuav tsis tuaj ua rog rau koj lossis ua rog rau lub tebchaws no, dua twg lawm? 20 Au vajntxwv uas yog kuv Tus Tswv, nimno thov koj mloog kuv hais, thov cia kuv tej lus taij thov tuaj txog ntawm koj xubntiag, es tsis txhob xa kuv rov mus rau hauv Yaunathas uas ua tus tub sau ntawv lub tsev tsam ces kuv tuag rau qhov ntawd.

21 Vajntxwv Xedekhiya‎s thiaj li hais kom lawv coj Yeremyah‎ mus kaw cia rau hauv cov tub rog uas zov vajntxwv lub loog. Ib hnub lawv coj ib lub ncuav ntawm txojkev uas luag ua ncuav los rau nws noj mus txog thaum tej ncuav hauv lub nroog tag huvsi lawm. Yog li no Yeremyah‎ thiaj nyob hauv cov tub rog zov vajntxwv lub loog.