Muab Yeremyah‎ Pov Rau Hauv Lub Qhov Dej Qhuav

1 Mathas tus tub Sefathiyas, thiab Pas-aws tus tub Kedaliyas, thiab Selemiyas tus tub Yukhas thiab Makhiyas tus tub Pasaws lawv tau hnov tej lus uas Yeremyah‎ hais rau cov pejxeem sawvdaws tias, 2(יחוח)Yahweh hais li no tias, leejtwg tseem nyob hauv lub nroog no mas yuav tuag hniav ntaj hniav riam thiab tuag tshaib tuag nqhis thiab tuag mob kis. Yog leejtwg tawm mus zwm rau cov Kheedias mas yuav dim txojsia. Nws yuav tau txojsia ua nqe zog hauv tshav rog los.

3 (יחוח)Yahweh hais li no tias, lub nroog no yuav raug muab cob rau hauv Npanpiloos tus vajntxwv cov tub rog txhais tes, mas lawv yuav txeeb tau. 4 Cov thawj thiaj hais rau vajntxwv Xedekhiya‎s tias, cia li muab tus yawg no tua pov tseg, vim nws ua rau cov tub rog uas tseem tshuav nyob hauv lub nroog no thiab cov pejxeem sawvdaws txhais tes tsaug leeg tag rau qhov uas nws hais tej lus li no rau lawv. Tus yawg no tsis nrhiav txojkev noj qab nyob zoo rau haiv neeg no, nws tsuas yog nrhiav kev txom nyem los xwb.

5 Vajntxwv Xedekhiya‎s hais tias, tus yawg no twb nyob hauv nej txhais tes lawm, vajntxwv tsis fim yuav tav tau nej.

6 Lawv txawm coj Yeremyah‎ mus thiab muab hlua tso nws nqes rau hauv vajntxwv tus tub Makhiyas lub qhov dej uas nyob hauv cov tub rog zov vajntxwv lub loog. Lub qhov dej ntawd tsis muaj dej, tsuas yog muaj av nplaum xwb, Yeremyah‎ thiaj zom rau hauv cov av nplaum ntawd.

7 Thaum Enpemelej uas yog tibneeg Khuj yog ib tug nraug sam nyob hauv vajntxwv lub tsev hnov tias lawv muab Yeremyah‎ tso rau hauv lub qhov dej ntawd, ces thaum vajntxwv nyob ntawm lub Rooj Loog Npeeyamee‎s,

8 Enpemelej txawm tawm hauv vajntxwv lub tsev mus hais rau vajntxwv tias,

9 Au vajntxwv uas yog kuv Tus Tswv, cov tibneeg no ua phem heev rau qhov uas lawv ua txhua yam no rau xibhwb Yeremyah‎ uas cev (יחוח)Yahweh lus, lawv muab nws pov rau hauv lub qhov dej. Nws yuav tuag tshaib rau hauv xwb, rau qhov hauv lub nroog no tsis tshuav ib lub ncuav noj kiag li lawm.

10 Ces vajntxwv thiaj hais rau Enpemelej uas yog tibneeg Khuj tias, cia li coj peb caug leej ntawm no nrog koj mus, mas rub Yeremyah‎ uas cev (יחוח)Yahweh lus tawm hauv lub qhov dej los ua ntej uas nws tsis tau tuag. 11 Enpemelej thiaj coj tibneeg nrog nws mus rau ntawm vajntxwv lub tsev chav uas rau qhov txhia chaw uas muaj ib lub phij xab rau khaubncaws, mas rho tej khaubncaws qub thiab tej khaub hlab los, muab hlua khi tso mus rau Yeremyah‎ hauv lub qhov dej. 12 Mas Enpemelej uas yog tibneeg Khuj hais rau Yeremyah‎ tias, cia li muab tej khaubncaws thiab tej khaub hlab tiag txoj hlua hauv koj qhov tsos. Yeremyah‎ ua raws li ntawd.

13 Lawv txawm muab txoj hlua rub Yeremyah‎ tawm hauv lub qhov dej los. Mas Yeremyah‎ tseem nyob hauv cov tub rog zov vajntxwv lub loog.

​

Xedekhiya‎s Rov Nug Yeremyah‎

14 Vajntxwv Xedekhiya‎s txib tibneeg mus coj Yeremyah‎ uas cev (יחוח)Yahweh lus los cuag nws ntawm txojkev uas nkag lub rooj loog uas peb rau hauv (יחוח)Yahweh lub tuam tsev. Vajntxwv hais rau Yeremyah‎ tias, kuv yuav nug koj ib nqes, koj tsis txhob zais ib yam abtsi ntawm kuv kiag li. 15 Yeremyah‎ thiaj hais rau Xedekhiya‎s tias, yog kuv hais rau koj, koj yeej yuav muab kuv tua pov tseg xwb. Yog kuv qhia abtsi rau koj, koj yeej yuav tsis mloog kuv hais. 16 Mas vajntxwv Xedekhiya‎s cog lus twv rau Yeremyah‎ twjywm tias, (יחוח)Yahweh uas tsim peb tus ntsuj plig muaj txojsia nyob pom, kuv yuav tsis tua koj lossis muab koj cob rau hauv cov tibneeg nrhiav kev txov koj txojsia txhais tes. 17 Yeremyah‎ thiaj hais rau Xedekhiya‎s tias, (יחוח)Yahweh uas muaj hwjchim loj kawg nkaus thiab yog cov Ixayees Tus Tswv hais li no tias, yog koj yeem muab koj tus kheej cob rau Npanpiloos tus vajntxwv cov thawj, mas lawv yuav tseg koj txojsia thiab lub nroog no yuav tsis raug hluavtaws hlawv. Koj thiab koj cuab tibneeg yuav muaj txojsia nyob. 18 Tiamsis yog koj tsis yeem muab koj cob rau Npanpiloos tus vajntxwv cov thawj, lub nroog yuav raug muab cob rau hauv cov Kheedias txhais tes, mas lawv yuav muab hluavtaws hlawv pov tseg, thiab koj yuav khiav tsis dim hauv lawv txhais tes. 19 Vajntxwv Xedekhiya‎s hais rau Yeremyah‎ tias, kuv ntshai cov Yudai uas nyiag kev khiav mus rau cov Kheedias lawm, tsam ces kuv raug muab cob rau cov tibneeg ntawd ces lawv tsim txom kuv.

20 Yeremyah‎ hais tias, luag yuav tsis muab koj cob rau lawv. Cia li mloog (יחוח)Yahweh tej lus raws li kuv hais rau koj, mas koj thiaj noj qab nyob zoo thiab lawv thiaj tseg koj txojsia. 21 Tiamsis yog koj tsis yeem muab koj tus kheej cob rau lawv, mas (יחוח)Yahweh qhia zaj yog toog rau kuv pom li no. 22 Kuv pom cov pojniam sawvdaws uas tshuav nyob hauv Yahdah tus vajntxwv lub tsev raug muab coj mus pub rau Npanpiloos tus vajntxwv cov thawj, thiab lawv hais tias, koj cov phoojywg uas koj tso siab dag ntxias koj thiab kov yeej koj lawm. Nimno koj txhais kotaw zom rau hauv pas iav, mas lawv tso koj tseg lawm.

23 Koj cov pojniam sawvdaws thiab koj cov tub yuav raug muab coj mus rau cov Kheedias, thiab koj tus kheej yuav tsis dim hauv lawv txhais tes. Koj yuav raug Npanpi-loos tus vajntxwv ntes, thiab lub nroog no yuav raug hluavtaws hlawv pov tseg. 24 Xede-khiyas txawm hais rau Yeremyah‎ tias, tsis txhob cia leejtwg paub tej lus no koj thiaj li tsis tuag. 25 Yog cov thawj hnov tias kuv tau nrog koj hais lus, thiab lawv tuaj cuag koj hais tias, cia li qhia saib koj hais li cas rau vajntxwv thiab vajntxwv hais li cas rau koj. Tsis txhob zais ib yam abtsi ntawm peb mas peb thiaj tsis muab koj tua pov tseg, 26 koj cia li hais rau lawv tias, kuv taij thov vajntxwv kom tsis txhob xa kuv rov qab mus tuag rau hauv Yaunathas lub tsev. 27 Mas cov thawj sawvdaws kuj tuaj cuag Yeremyah‎ thiab nug nws, mas nws kuj teb lawv raws li vajntxwv qhia rau nws. Ces lawv txawm tseg tsis nug nws vim qhov uas ob tug sib tham tsis muaj leejtwg hnov.

28 Yeremyah‎ txawm nyob hauv cov tub rog uas zov vajntxwv lub loog mus txog hnub uas Yeluxalees poob lawm.

​