YEREMYAH 40

Yeremyah‎ Nrog Kedaliyas Nyob

1 (יחוח)Yahweh hais lus tuaj rau Yeremyah‎ yog tom qab uas Nenpu-xaladas uas yog tus thawj rog zov vajntxwv tau muab Yeremyah‎ tso dim ntawm Lamas lawm, yog thaum lawv ntes Yeremyah‎ khi nrees nrog cov hauv Yeluxalees thiab cov hauv Yahdah uas raug muab ntes kuav mus rau Npanpiloos. 2 Tus thawj rog uas zov vajntxwv thiaj coj Yeremyah‎ los mas hais rau nws tias, (יחוח)Yahweh uas yog koj Tus Tswv twb tshaj tawm tej kev puam tsuaj uas raug lub chaw no lawm.

3 Nimno (יחוח)Yahweh yeej ua kom tiav thiab ua raws li nws twb hais tseg lawm. Vim yog nej tau ua txhaum rau (יחוח)Yahweh thiab tsis mloog nws tej lus, tej xwm txheej no thiaj poob rau saum nej. 4 Saib maj, hnub no kuv tso koj dim txoj saw hlau ntawm koj txhais tes. Yog koj pom zoo nrog kuv mus rau Npanpiloos, kuj mus, kuv yuav tsom kwm koj tib zoo. Tiamsis yog koj tsis pom zoo nrog kuv mus rau Npanpiloos kuj tsis txhob mus. Lub tebchaws no huvsi nyob ntawm koj xubntiag, koj yuav mus rau qhov twg uas koj pom zoo kuj tau.

 5 Yog koj yuav nyob ntawm no, koj cia li rov mus cuag Kedaliyas, uas yog Ahikhas tus tub thiab yog Safas tus xeeb ntxwv, nws yog tus uas vajntxwv Npanpiloos tsa ua tus thawj kav Yahdah tej moos. Koj mus nrog nws nyob rau hauv ib tsoom pejxeem, lossis yuav mus rau qhov twg uas koj pom zoo kuj tau. Tus thawj rog uas zov vajntxwv cia li muab zaub mov thiab tshav ntuj rau Yeremyah‎ ces muab nws tso mus.

6 Yeremyah‎ thiaj mus cuag Ahikhas tus tub Kedaliyas ntawm Mixapas, thiab nrog nws nyob rau hauv ib tsoom pejxeem uas tshuav nyob hauv lub tebchaws ntawd.

Kedaliyas Tuag

7 Thaum Yahdah cov thawj tub rog huvsi uas tsiv nraim lawm thiab lawv cov tub rog tau hnov hais tias vajntxwv hauv Npanpiloos tau tsa Ahikhas tus tub Kedaliyas ua tus thawj kav lub tebchaws thiab muab tej pojniam txivneej menyuam uas pluag kawg hauv lub tebchaws cob rau nws kav, lawv yog cov uas tsis raug muab kuav mus rau Npanpiloos,

8 Nethaniyas tus tub Yisama‑eess thiab Khale‑as tus tub Yauhanas, thiab Thahumes tus tub Xelayas, thiab Efais cov tub uas yog tibneeg hauv lub moos Nethaufas, thiab Yexaniyas uas yog tibneeg Ma‑akhas tus tub, lawv thiab lawv cov tibneeg sawvdaws mus cuag Kedaliyas ntawm Mixapas. 9 Kedaliyas uas yog Ahikhas tus tub, thiab yog Safas tus xeeb ntxwv, cog lus twv rau lawv thiab lawv cov tibneeg hais tias, tsis txhob ntshai mus ua num rau cov Kheedias. Cia li nyob hauv lub tebchaws no thiab ua num rau vajntxwv Npanpiloos ces nej yuav tau noj qab nyob zoo. 10 Kuv tus kheej mas kuv yuav nyob hauv Mixapas, sawv cev nej chaw rau cov Kheedias uas tuaj cuag peb. Tiamsis nej mas cia li mus khaws nej tej cawv txiv hmab thiab tej txiv ntoo lub caij ntuj kub thiab tej roj aulib, coj mus ntim cia hauv hub, thiab cia li mus nyob hauv tej moos uas nej txeeb tau ntawd. 11 Ib yam li ntawd, thaum cov Yudais uas nyob hauv Mau‑as tebchaws thiab hauv Asmoo‎s thiab hauv Edoos thiab hauv lwm lub tebchaws sawvdaws tau hnov tias vajntxwv hauv Npanpiloos tso ib co tibneeg nyob hauv Yahdah, thiab tsa Kedaliyas uas yog Ahikhas tus tub thiab yog Safas tus xeeb ntxwv ua tus kav lawv, 12 mas cov Yudais sawvdaws kuj rov qab los ntawm txhua lub tebchaws uas lawv raug ntiab mus nyob ntawd, los rau hauv Yahdah tebchaws, thiab los cuag Kedaliyas ntawm Mixapas. Mas lawv khaws tej cawv txiv hmab thiab tej txiv ntoo lub caij ntuj kub ntau heev. 13 Khale‑as tus tub Yauhanas thiab cov thawj tub rog sawvdaws uas tsiv nraim lawm tuaj cuag Kedaliyas ntawm Mixapas, 14 thiab hais rau nws tias, koj puas paub tias Npa‑alis uas yog cov Asmoo‎s tus vajntxwv tau txib Nethaniyas tus tub Yisama‑eess tuaj tua koj? Tiamsis Ahikhas tus tub Kedaliyas tsis ntseeg lawv hais. 15 Mas Khale‑as tus tub Yauhanas hais twjywm rau Kedaliyas hauv Mixapas tias, cia kuv mus tua Nethaniyas tus tub Yisama‑eess pov tseg, tsis muaj leejtwg yuav paub li. Ua cas yuav cia nws muab koj tua, mas cov Yudais sawvdaws uas tuaj koom rau koj yuav khiav ua sab ua sua, thiab cov tibneeg Yahdah uas tseem tshuav nyob yuav puam tsuaj?

16 Tiamsis Ahikhas tus tub Kedaliyas hais rau Khale‑as tus tub Yauhanas tias, koj tsis txhob ua zaj kod, qhov uas koj hais txog Yisama‑eess ntawd tsis muaj tseeb.