1 Lub xya hli, Nethaniyas tus tub Yisama‑ees uas yog Elisamas tus xeeb ntxwv thiab yog keeb vajntxwv, thiab nws yog vajntxwv ib tug thawj tub rog loj, tau coj kaum leej nrog nws tuaj cuag Ahikhas tus tub Kedaliyas ntawm Mixapas. Mas thaum lawv tabtom noj mov ua ke hauv Mixapas, 2 Nethaniyas tus tub Yisama‑ees thiab kaum leej uas nrog nws tuaj txawm sawv tsees xuas ntaj muab Kedaliyas uas yog Ahikhas tus tub thiab yog Safas tus xeeb ntxwv tua tuag, nws yog tus uas vajntxwv hauv Npanpiloos tsa ua tus thawj kav lub tebchaws ntawd.

3 Yisama‑ees kuj tua cov Yudai uas nrog Kedaliyas nyob hauv Mixapas huvsi, thiab tua cov tub rog Kheedias uas nyob ntawd thiab.

4 Hnub tom qab uas Kedaliyas raug tua lawm thiab tsis tau muaj leejtwg paub li, 5 muaj yim caum tus txivneej tuaj ntawm lub moos Sekhees thiab lub moos Silaus thiab lub nroog Xamalis tuaj. Lawv chais hwj txwv du lug thiab tej ris tsho ntuag tag, thiab ib ce raug muab suam to tag. Lawv coj qoob loo xyeem thiab hmoov tshuaj tsw qab tuaj xyeem rau ntawm (יחוח)Yahweh lub tuam tsev. 6 Mas Nethaniyas tus tub Yisama‑ ees tawm hauv Mixapas los ntsib nthav lawv cov ntawd, nws taug kev quaj quaj los. Thaum nws ntsib lawv nws hais rau lawv tias, cia li tuaj cuag Ahikhas tus tub Kedaliyas nawj. 7 Thaum lawv tuaj txog hauv lub nroog, Nethaniyas tus tub Yisama‑ees thiab cov uas nrog nws tuaj kuj muab lawv tua pov tseg tag, thiab muab lawv pov rau hauv pas dej. 8 Tiamsis cov uas tuaj ntawd muaj kaum leej hais rau Yisama‑ees tias, thov tsis txhob tua peb, rau qhov peb muaj mog muaj qeb muaj roj muaj zib ntab zais rau tom teb. Yog li no nws thiaj tsis muab lawv tua nrog cov uas nrog lawv tuaj ua ke. 9 Lub pas dej uas Yisama‑ees muab cov uas nws tua tuag pov rau hauv yog lub pas dej loj uas vajntxwv Axas khawb los tau dej siv rau thaum cov Ixayees tus vajntxwv Npa‑asas tuaj ua rog rau lawv. Mas Nethaniyas tus tub Yisama‑ees kuj muab cov uas nws tua tuag tso puv nkaus rau hauv.

10 Mas Yisama‑ ees ntes cov tibneeg hauv Mixapas huvsi, uas yog vajntxwv tej ntxhais thiab tej pejxeem uas tseem tshuav nyob hauv Mixapas sawvdaws, yog cov uas Nenpuxa-ladas uas yog tus thawj rog zov vajntxwv muab cob rau Ahikhas tus tub Kedaliyas. Nethaniyas tus tub Yisama‑ees ntes lawv coj sawv kev hla mus rau cov tibneeg Asmoo‎s.

11 Thaum Khale‑as tus tub Yauhanas thiab cov thawj rog uas nrog nws ua ke hnov tej xwm txheej phem uas Nethaniyas tus tub Yisama‑ees tau ua ntawd,

12 lawv txawm txhij lawv cov tibneeg sawvdaws mus ua rog rau Nethaniyas tus tub Yisama‑ees. Lawv ntsib nws ntawm lub pas dej loj uas nyob ntawm lub moos Kinpe‑oos. 13 Thaum cov tibneeg sawvdaws uas Yisama‑ees ntes mus pom Khale‑as tus tub Yauhanas thiab cov thawj rog uas nrog nws ua ke, lawv zoo siab heev.

14 Cov tibneeg uas Yisama‑ees tau ntes coj hauv Mixapas mus txawm tig kiag khiav rov qab, thiab mus cuag Khale‑as tus tub Yauhanas. 15 Ces Nethaniyas tus tub Yisama‑ees thiab yim leej uas nrog nws ua ke txawm khiav dim ntawm Yauhanas mus rau hauv cov tibneeg Asmoo‎s. 16 Mas Khale‑as tus tub Yauhanas thiab cov thawj tub rog uas nrog nws ua ke coj cov pejxeem sawvdaws uas Nethaniyas tus tub Yisama‑ees tau ntes coj hauv Mixapas mus lawm rau thaum uas nws tua Ahikhas tus tub Kedaliyas, lawv yog cov tub rog, thiab tej pojniam menyuam thiab tej nraug sam uas Yauhanas coj ntawm Kinpe‑oos rov los.

17 Lawv mus nyob rau ntawm Kelukhihas uas ze Npelehees. Lawv npaj siab yuav khiav mus rau Iziv tebchaws 18 vim yog lawv ntshai cov Kheedias rau qhov uas Nethaniyas tus tub Yisama‑ees tau tua Ahikhas tus tub Kedaliyas, yog tus uas vajntxwv hauv Npanpiloos tsa ua tus thawj kav lub tebchaws ntawd.