YEREMYAH 42

Yeremyah‎ Hais (יחוח)Yahweh Tej Lus Rau Yauhanas

1 Cov thawj tub rog sawvdaws thiab Khale‑as tus tub Yauhanas thiab Hausayas tus tub Axaliyas thiab cov pejxeem txij tus yau kawg mus txog tus loj kawg sawvdaws tau tuaj, 2 thiab hais rau Yeremyah‎ uas yog xibhwb cev (יחוח)Yahweh lus tias, thov koj mloog peb tej lus taij thov thiab koj thov (יחוח)Yahweh uas yog koj Tus Tswv pab peb cov uas tseem tshuav nyob no sawvdaws, rau qhov peb tshuav tsawg kawg li raws li koj lub qhov muag pom ntsoov.

3 Thov (יחוח)Yahweh uas yog koj Tus Tswv qhia rau peb paub txojkev uas peb yuav tsum mus thiab qhia tej uas peb yuav tsum ua.

4 Yeremyah‎ uas cev (יחוח)Yahweh lus hais rau lawv tias, kuv hnov nej hais lawm. Saib maj, kuv yuav thov (יחוח)Yahweh uas yog nej Tus Tswv raws li nej tej lus taij thov.

Yog (יחוח)Yahweh teb li cas rau nej kuv yuav hais rau nej. Kuv yuav tsis npog ib yam abtsi li. 5 Mas lawv hais rau Yeremyah‎ tias, thov (יחוח)Yahweh ua timkhawv ncaj ncees thiab tseeb rau peb yog peb tsis ua raws li txhua lo lus uas (יחוח)Yahweh uas yog koj Tus Tswv txib koj qhia peb.

6 Txawm yog nws teb zoo thiab tsis zoo los peb yuav mloog (יחוח)Yahweh uas yog peb Tus Tswv tej lus uas peb txib koj mus thov, mas thaum peb mloog (יחוח)Yahweh uas yog peb Tus Tswv tej lus peb thiaj noj qab nyob zoo. 7 Thaum puv kaum hnub lawm (יחוח)Yahweh hais lus tuaj rau Yeremyah‎. 8 Mas nws thiaj hu Khale‑as tus tub Yauhanas thiab cov thawj tub rog sawvdaws uas nrog nws nyob thiab cov pejxeem sawvdaws txij tus yau kawg mus txog tus loj kawg tuaj, 9 thiab hais rau lawv tias, (יחוח)Yahweh uas yog Ixayees Tus Tswv uas nej tau txib kuv coj nej tej lus taij thov mus hais rau nws hais li no tias, 10 Yog nej nyob hauv lub tebchaws no kuv yuav tsim tsa nej thiab tsis muab nej rhuav, kuv yuav muab nej cog tsis muab nej dob, rau qhov kuv tu siab tej xwm txheej phem uas kuv tso rau nej lawm. 11 Tsis txhob ntshai tus vajntxwv hauv Npanpiloos uas nej yeej los ntshai ntawd. (יחוח)Yahweh hais tias, tsis txhob ntshai nws vim kuv twb nrog nej nyob lawm, yuav cawm nej thiab tso nej dim hauv nws txhais tes.

12 Kuv yuav khuvleej nej xwv nws thiaj khuvleej nej thiab kheev nej nyob hauv nej lub tebchaws. 13 Tiamsis yog nej tsis mloog (יחוח)Yahweh uas yog nej Tus Tswv tej lus, es nej hais tias, peb yuav tsis nyob hauv lub tebchaws no, 14 thiab hais tias, peb tsis yeem, peb yuav mus rau hauv Iziv tebchaws, yog qhov chaw uas peb yuav tsis pom muaj kev ua rog thiab yuav tsis hnov suab raj txhib rog, thiab tsis tshaib plab thiab peb yuav nyob qhov ntawd, 15 cov Yahdah uas tseem tshuav nyob es, cia li mloog (יחוח)Yahweh tej lus. (יחוח)Yahweh tus muaj hwjchim loj kawg nkaus uas yog Ixayees Tus Tswv hais li no tias, yog nej npaj siab yuav mus rau hauv Iziv tebchaws thiab mus nyob qhov ntawd, 16 mas rab ntaj uas nej ntshai yuav caum cuag nej rau hauv Iziv tebchaws, thiab tej kev tshaib nqhis uas nej ntshai ntawd yuav caum nej qab mus rau hauv Iziv tebchaws thiab nej yuav tuag rau qhov ntawd. 17 Txhua tus uas npaj siab mus nyob rau hauv Iziv tebchaws yuav tuag hniav ntaj hniav riam thiab tuag tshaib tuag nqhis thiab tuag mob kis, yuav tsis tshuav ib tug nyob lossis dim tej xwm txheej phem uas kuv yuav tso los rau saum lawv. 18(יחוח)Yahweh tus muaj hwj-chim loj kawg nkaus uas yog Ixayees Tus Tswv hais li no tias, kuv nchuav kuv txojkev chim kev npau rau saum cov uas nyob hauv Yeluxalees li cas, kuv kuj yuav nchuav kuv txojkev npau rau saum nej rau thaum nej mus txog Iziv tebchaws ib yam li ntawd thiab. Luag yuav tuav nej lub npe tsawm foom, nej yuav ua chaw rau luag ceeb thiab ntshai, thiab nej yuav ua lo lus tsawm foom thiab nej yuav raug luag thuam luag. Nej yuav tsis pom lub chaw no dua li lawm. 19 Cov Yahdah uas tseem tshuav nyob es, (יחוח)Yahweh tau hais rau nej tias, tsis txhob mus rau Iziv tebchaws. Nej cia li paub tseeb tias hnub no kuv twb ntuas nej tias, 20 nej tau yuam kev puas rau nej txojsia, vim yog nej txib kuv mus cuag (יחוח)Yahweh uas yog nej Tus Tswv hais tias, thov koj pab peb thov (יחוח)Yahweh uas yog peb Tus Tswv. (יחוח)Yahweh uas yog peb Tus Tswv hais li cas, thov qhia rau peb mas peb yuav ua li ntawd.

21 Mas hnub no kuv twb qhia (יחוח)Yahweh tej lus rau nej lawm, tiamsis nej tsis mloog (יחוח)Yahweh uas yog nej Tus Tswv tej lus ib qho li, yog tej uas (יחוח)Yahweh txib kuv los hais rau nej. 22 Vim li no nimno cia li paub tseeb tias nej yuav tuag hniav ntaj thiab tuag tshaib tuag nqhis thiab tuag mob kis rau hauv lub chaw uas nej ntshaw mus nyob ntawd.