Yeremyah‎ Hais Tej Kev Puam Tsuaj

1 (יחוח)Yahweh hais lus tuaj rau Yeremyah‎ ntsig txog cov Yudai sawvdaws hauv Iziv tebchaws, uas nyob hauv lub moos Midoos thiab Thapahes thiab Meefis thiab hauv tebchaws Palaus, hais tias, 2 (יחוח)Yahweh tus muaj hwjchim loj kawg nkaus, uas yog Ixayees Tus Tswv, hais li no tias, nej twb pom tej xwm txheej phem uas kuv tso los rau hauv Yeluxalees thiab tej moos hauv Yahdah huvsi. Saib maj, niaj hnub nimno tej moos ntawd nyob do cuas cia tsis muaj leejtwg nyob hauv li. 3 Twb yog vim tej kev phem uas lawv ua zes ua rau kuv chim, yog qhov uas lawv mus hlawv xyab thiab ua koom tu luag tej dab uas lawv tsis tau paub dua li, tsis hais lawv lossis nej thiab nej tej poj koob yawm txwv. 4 Tiamsis kuv twb tso kuv cov tub qhe uas yog cov xibhwb cev kuv lus sawvdaws tuaj rau nej tsis tu ncua hais tias, nej tsis txhob ua tej kev qias vuab tsuab no uas kuv ntxub. 5 Tiamsis lawv tsis mloog, lawv tsis tig ntsej mloog es tig hlo ntawm tej kev phem thiab tseg tsis txhob hlawv xyab rau luag tej dab. 6 Vim li no kuv thiaj nchuav kuv txojkev chim kev npau taws los rau hauv Yahdah tej moos thiab hauv tej kev hauv lub nroog Yeluxalees, mas tej moos ntawd thiaj raug muab tso tseg nyob do cuas yam li niaj hnub nimno. 7 Mas nimno (יחוח)Yahweh tus muaj hwjchim loj kawg nkaus, uas yog Ixayees Tus Tswv, hais li no tias, Ua cas nej ua tej kev phem loj no rau nej ris? Nej txiav tej pojniam txivneej tej menyuam yaus thiab menyuam mos tawm hauv Yahdah nej thiaj tsis tshuav tibneeg nyob li. 8 Ua cas nej txhais tes yuav ua tej uas zes ua rau kuv chim? Yog qhov uas nej hlawv xyab rau luag tej dab hauv Iziv tebchaws uas nej los nyob no, nej thiaj raug muab txiav pov tseg thiab ua lo lus tsawm foom thiab yuav raug ib tsoom teb-chaws huvsi hauv ntiajteb thuam luag. 9 Nej tsis nco qab tej kev phem uas nej tej poj koob yawm txwv ua, thiab tej kev phem uas Yahdah tej vajntxwv ua thiab lawv cov poj-niam ua, thiab tej kev phem uas nej thiab nej tej pojniam ua, hauv Yahdah tebchaws thiab hauv tej kev hauv Yeluxalees lawm lov?

10 Txawm yog niaj hnub nimno los lawv tsis txo hwjchim, thiab tsis hwm tsis ntshai kuv, thiab tsis ua raws li kuv txoj kevcai thiab kuv tej kab ke uas kuv qhia rau nej thiab nej tej poj koob yawm txwv. 11 Vim li no, (יחוח)Yahweh tus muaj hwjchim loj kawg nkaus uas yog Ixayees Tus Tswv hais li no tias, saib maj, kuv yuav tsom ntsoov coj xwm txheej phem los raug nej, thiab yuav txiav Yahdah pov tseg huvsi. 12 Kuv yuav muab cov Yahdah uas tseem tshuav nyob yog cov uas tau npaj siab mus nyob rau hauv Iziv tebchaws, mas lawv yuav raug puam tsuaj tag huvsi. Lawv yuav ntog tag hauv Iziv tebchaws, lawv yuav raug hniav ntaj thiab kev tshaib nqhis puam tsuaj tag. Txij tus me kawg txog tus loj kawg lawv yuav tuag hniav ntaj thiab tuag tshaib tuag nqhis. Luag yuav tuav lawv lub npe tsawm foom, lawv yuav ua chaw rau luag ceeb thiab ntshai, thiab lawv yuav ua lo lus tsawm foom thiab lawv yuav raug luag thuam luag. 13 Kuv yuav rau txim rau lawv cov uas mus nyob hauv Iziv tebchaws ib yam li kuv xuas ntaj xuas kev tshaib nqhis thiab mob kis rau txim rau Yeluxalees, 14 ua rau cov tibneeg Yahdah uas tseem tshuav nyob uas tuaj nyob hauv Iziv tebchaws yuav tsis dim ib tug li thiab tsis tshuav uas yuav rov mus nyob hauv Yahdah tebchaws, yog lub chaw uas lawv xav rov mus nyob. Tiamsis lawv tsis tau rov mus li, tsuas yog qee leej uas khiav mus cawm siav xwb. 15 Mas cov txivneej sawvdaws uas paub hais tias nws pojniam tau hlawv xyab rau luag tej dab, thiab tej pojniam uas sawv ua ke coob coob ntawd, yog sawvdaws uas nyob hauv Palau hauv Iziv tebchaws, teb Yeremyah‎ tias, 16 Tej lus uas koj tuav (יחוח)Yahweh lub npe hais rau peb, peb tsis mloog. 17 Peb yuav ua txhua yam raws li peb yeem lus cia, yog hlawv xyab xyeem rau tus dab poj vaj saum ntuj thiab hliv cawv xyeem rau nws raws li uas peb txeev ua, uas yog peb thiab peb tej poj koob yawm txwv thiab peb tej vajntxwv thiab cov thawj ua rau hauv Yahdah tej moos thiab tej kev hauv Yeluxalees. Thaum peb ua li ntawd peb muaj zaub mov noj txaus thiab noj qab nyob zoo thiab tsis pom ib yam xwm txheej phem li. 18 Tiamsis txij thaum peb tseg tsis hlawv xyab rau tus dab poj vaj saum ntuj thiab tsis hliv cawv xyeem rau nws peb txawm pluag txhua yam thiab raug kev puam tsuaj ntawm hniav ntaj thiab kev tshaib nqhis.

19 Cov pojniam hais tias, thaum peb hlawv xyab rau tus dab poj vaj saum ntuj thiab hliv cawv xyeem rau nws, qhov uas peb ua lub ncuav zoo li dab poj vaj saum ntuj xyeem thiab hliv cawv xyeem rau nws ntawd, peb cov txiv tsis pom zoo lov? 20 Mas Yeremyah‎ hais rau cov pojniam txivneej sawvdaws uas teb nws, hais tias, 21 Tej xyab uas nej hlawv hauv Yahdah tej moos thiab tej kev hauv Yeluxalees tsis hais nej thiab nej tej poj koob yawm txwv thiab nej tej vajntxwv thiab nej cov thawj thiab tej pejxeem, (יחוח)Yahweh tsis tau muab cim cia lov? Nws nco tsis txog lov? 22 (יחוח)Yahweh thev tsis taus nej tej kev phem kev qias vuab tsuab uas nej ua ntawd ntxiv mus lawm. Vim li no nej lub tebchaws thiaj raug muab tso tseg nyob do cuas thiab ua lub chaw uas tsawm foom, tsis muaj tibneeg nyob yam li niaj hnub nimno. 23 Vim yog nej hlawv xyab thiab vim yog nej ua txhaum rau (יחוח)Yahweh thiab tsis mloog (יחוח)Yahweh tej lus thiab tsis ua raws nws txoj kevcai thiab nws tej kab ke thiab nws tej lus qhia, tej xwm txheej phem no thiaj raug nej yam li niaj hnub nimno. 24 Yeremyah‎ hais rau cov tibneeg huvsi thiab cov pojniam huvsi tias, nej cov tibneeg Yahdah uas nyob hauv Iziv tebchaws sawvdaws, cia li mloog (יחוח)Yahweh tej lus.

25 (יחוח)Yahweh tus muaj hwjchim loj kawg nkaus uas yog Ixayees Tus Tswv hais li no tias, nej thiab nej tej pojniam tau hais ntawm nej lub qhov ncauj ntag thiab nej txhais tes tau ua kom tiav, raws li nej tau hais tias, peb yuav ua tej uas peb tau yeem lus cia tiag tiag li, peb yuav hlawv xyab rau dab poj vaj saum ntuj thiab hliv cawv xyeem rau nws. Nej cia li tuav rawv tej uas nej yeem lus tseg thiab pauj tej uas nej yeem lus maj. 26 Vim li no, cov tibneeg Yahdah uas nyob hauv Iziv tebchaws sawvdaws es, cia li mloog (יחוח)Yahweh tej lus. (יחוח)Yahweh hais tias, saib maj, kuv tuav kuv lub npe uas loj kawg cog lus khov kho tseg tias cov tibneeg Yahdah uas nyob hauv Iziv tebchaws tsis hais nyob qhovtwg tsis muaj ib lub qhov ncauj twg yuav tuav kuv lub npe twv tias, Muaj (יחוח)Yahweh uas muaj txojsia nyob pom. 27 Saib maj, kuv saib ntsoov lawv rau qhov phem tsis yog saib rau qhov zoo. Cov tibneeg Yahdah uas nyob hauv Iziv tebchaws sawvdaws yuav raug hniav ntaj thiab kev tshaib nqhis puam tsuaj tag mus txog thaum lawv suaj kaum kiag. 28 Thiab cov uas khiav dim hniav ntaj yuav khiav hauv Iziv tebchaws mus rau Yahdah tebchaws muaj tsawg kawg, thiab cov Yahdah uas tshuav nyob huvsi uas khiav los nyob hauv Iziv tebchaws yuav paub tias leejtwg tej lus tseeb, yog lawv li tseeb los yog kuv li tseeb.

29(יחוח)Yahweh hais tias, no yog tej txujci uas yuav qhia rau nej paub tias kuv yuav rau txim rau nej hauv lub chaw no, kom nej thiaj paub tias kuv tej lus uas hais kev puam tsuaj rau nej yeej muaj tseeb.

 30(יחוח)Yahweh hais li no tias, kuv yuav muab Iziv tus vajntxwv Falaus Haufa rau hauv nws cov yeeb ncuab txhais tes thiab muab rau hauv cov uas nrhiav txov nws txojsia txhais tes, ib yam li uas kuv muab Yahdah tus vajntxwv Xedekhiya‎s rau hauv vajntxwv Nenpukhanexa‎s hauv Npanpiloos txhais tes, uas yog nws tus yeeb ncuab thiab nrhiav txov nws txojsia.