Tej Lus Hais Txog Iziv

1 (יחוח)Yahweh tej lus uas hais tuaj rau Yeremyah‎ uas yog xibhwb cev (יחוח)Yahweh lus ntsig txog ib tsoom tebchaws.

2 No yog tej uas hais txog Iziv tebchaws, hais txog Iziv tus vajntxwv Falaus Nekhau‎s pab tub rog uas nyob ntawm ntug dej Yufetis hauv lub moos Khakhemis, uas vajntxwv Nenpukhanexa‎s hauv Npanpiloos ntaus yeej, rau xyoo plaub uas Yauxiyas tus tub Yehauyakhi‎s ua vajntxwv kav Yahdah.

3 Cia li npaj daim hlau tiv thaiv loj thiab daim uas me, thiab tawm mus ua rog.

4 Cia li nog eeb rau nees, cia li nce kiag caij nees. Cia li ntoo nej tej mom hlau mus sawv ntawm nej lub chaw ua rog thiab hov nej rab hmuv thiab hnav nej lub tsho hlau. 5 Kuv pom abtsi? Lawv ntshai kawg li, lawv tig loo khiav rov qab. Lawv tej tub rog raug muab ntaus ntog thiab khiav sai kawg li lawm. Lawv tsis tig saib qab li. Kev txhawj kev ntshai muaj rau txhua fab. (יחוח)Yahweh hais li no ntag. 6 Tus uas nrawm kuj khiav tsis taus, tub rog kuj khiav tsis dim, lawv dawm thiab ntog tag rau sab qaum teb ped ntawm ntug dej Yufetis. 7 No yog leejtwg nev, nyab kiag tuaj zoo yam nkaus li tus dej Nais, zoo yam nkaus li tej dej sab siv ntws ceev? 8 Iziv nyab kiag tuaj zoo yam nkaus li tus dej Nais, zoo yam nkaus tej dej sab siv ntws ceev. Nws hais tias, kuv yuav sawv, kuv yuav nyab lub ntiajteb. Kuv yuav ua rau tej moos thiab tej tibneeg puam tsuaj tag. 9 Tej nees es, cia li sawv kev mus, tej tsheb nees ua rog es, cia khiav nrawm nroos. Cia cov tub rog tawm mus, yog cov tibneeg Khuj thiab cov tibneeg Phuj uas tuav daim hlau thaiv, thiab cov tibneeg Lus uas txawj tua hneev.

10 Hnub ntawd yog (יחוח)Yahweh uas muaj hwjchim loj kawg hnub, yog hnub uas ua pauj, yog hnub uas nws yuav ua pauj rau nws cov tshawj chim. Rab ntaj yuav noj kom tsau, thiab haus lawv cov ntshav kom pov khawv, vim yog (יחוח)Yahweh uas muaj hwjchim loj kawg nkaus ua kevcai tua xyeem rau hauv sab qaum teb ped ntawm ntug dej Yufetis. 11 Iziv tus ntxhais uas dawb huv es, cia li nce mus rau Kile‑as, mus muab tshuaj. Koj twb siv tshuaj ntau kawg lawm tsis tau qabhau, mas koj kho tsis tau kom zoo. 12 Tej tebchaws twb hnov txog koj txojkev txaj muag, koj lub suab quaj mus thoob ntiajteb, vim yog cov tub rog sib dawm, lawv ib txhij ntog tag. 13 (יחוח)Yahweh tej lus uas hais rau Yeremyah‎ uas yog xibhwb cev (יחוח)Yahweh lus hais txog qhov uas vajntxwv Nenpukhanexa‎s hauv Npanpiloos tuaj ntaus Iziv tebchaws. 14 Cia li tshaj tawm hauv Iziv, thiab piav hauv lub moos Midoos, cia li piav hauv lub moos Meefis thiab lub moos Thapahes, hais tias, sawv ntsug thiab npaj kom txhij, rau qhov rab ntaj yuav noj puag ncig nej. 15 Ua cas tus dab Apis khiav lawm? Ua cas nej tus dab mlom txiv nyuj nyob tsis ruaj? Vim yog (יחוח)Yahweh muab nws thawb ntog.

16 Nej cov tibneeg coob coob kuj dawm thiab ntog, thiab lawv ib leeg hais rau ib leeg tias, cia li sawv tsees nawj, cia peb rov qab mus rau ntawm peb haiv neeg, mus rau lub tebchaws uas yug peb, vim yog tim tus uas quab yuam rab ntaj.

17 Cia li hu cov Iziv tus vajntxwv Falaus lub npe hais tias, tus uas tshoob hawb tso tej sijhawm tag dawb. 18 Tus vajntxwv uas lub npe hu ua (יחוח)Yahweh uas muaj hwjchim loj kawg nkaus hais tias, kuv yeej muaj txojsia nyob, mas yuav muaj ib tug tuaj zoo ib yam li lub roob Thanpaus uas nyob hauv nruab nrab tej roob thiab zoo yam li lub roob Khamee ntawm ntug hiavtxwv. 19 Cov tibneeg Iziv es, cia li hwbxwm tej qhov txhia chaw siv rau thaum nej raug ntes coj mus, rau qhov lub moos Meefis yuav pob tag, nyob do cuas cia, tsis muaj tibneeg nyob. 20 Iziv yog tus xyuas nyuj uas zoo nkauj, tiamsis ib tug yoov nyuj sab qaum teb ped tuaj tom nws. 21 Txawm yog nws cov tub rog uas ntiav nrog nws nyob zoo yam nkaus li tej menyuam nyuj rog rog, los lawv cia li tig kiag khiav tag mus ua ke, lawv tsis tiv rog kiag li, vim yog hnub uas lawv raug puam tsuaj twb los txog lawv lawm, yog lub sijhawm uas rau txim rau lawv.

22 Nws ua lub suab zoo yam li tus nab uas tabtom ntaug leev mus, vim yog nws cov yeeb ncuab tuaj ua ib pab coob coob, thiab coj taus tuaj tawm tsam nws zoo yam li cov tibneeg uas tuaj ntov ntoo. 23 (יחוח)Yahweh hais tias, txawm yog nws lub hav zoov ntom nti los lawv yuav muab ntov tag huvsi, rau qhov lawv cov coob dua tej kooj txig twb suav tsis txheeb. 24 Iziv tus ntxhais yuav raug txaj muag, nws yuav raug muab cob rau hauv ib haiv neeg uas nyob sab qaum teb ped txhais tes. 25 (יחוח)Yahweh tus muaj hwjchim loj kawg nkaus uas yog Ixayees Tus Tswv hais tias, saib maj, kuv yuav coj kev rau txim rau tus dab Asmoo‎s hauv lub moos Thenpes, thiab rau Falaus thiab rau Iziv thiab Iziv tej dab thiab nws tej vajntxwv, yog rau txim rau Falaus thiab cov uas tso siab rau nws. 26 Kuv yuav muab lawv cob rau hauv cov uas nrhiav txov lawv txojsia txhais tes, yog vajntxwv Nenpukhanexa‎s hauv Npanpiloos thiab nws cov thawj rog txhais tes. Dhau yav tom qab Iziv mam li muaj tibneeg nyob, ib yam li thaum ub. (יחוח)Yahweh hais li no ntag.

27 Kuv tus qhev Yakhauj es, tsis txhob ntshai, Ixayees es, tsis txhob poob siab nthav, rau qhov, saib maj, kuv yuav cawm neb dim hauv lub chaw uas deb los, thiab pab neb tej tub ki xeeb ntxwv tawm hauv lub tebchaws uas lawv raug ntes los. Yakhauj yuav rov los thiab nyob kaj siab lug thiab noj qab nyob zoo, tsis muaj leejtwg yuav ua rau nws ntshai.

28(יחוח)Yahweh hais tias, kuv tus qhev Yakhauj es, tsis txhob ntshai vim kuv nrog nraim koj nyob. Kuv yuav muab txhua lub tebchaws uas kuv tau ntiab nej mus nyob hauv lawd rhuav kom puam tsuaj tag huvsi, tiamsis kuv tsis ua rau nej puam tsuaj tag. Kuv yuav nplawm qhuab qhia nej raws li uas tsim nyog ua. Kuv yeej yuav tsis tseg qhov uas rau txim rau nej.